عمـــــــــــــــــــــــــــــــــار يا مصر

بصراحة انا بحب مصر جدا

لكن بكره التخلف و الروتين و الظلم جدا جداااااااااااااااا
.
انا اينعم زى ما الكل بيقولى "انت لسة مشفتش حاجة"

بس برضه شفت حاجات تطير الدماغ


.
حكايتى مع المرور.....,
.


يوم التلات اللى فات كنت عند ناس قرايبى

فى لوران"ده منطقة فى اسكندرية"

و كنت ماشى بالعربية فى شارع جانبى و طالع على شارع رئيسى

لقيت عند بداية الشارع عربيتين واقفين

المهم عطيت كلاكس و رعشان بس بدون استجابة و كان الناس واقفين

جنبهم المهم بدأت ارجع , لمحت شخص طلع من وسطهم يبص عليا

و طلع ظابط مرور و تقريبا دى لجنة او حادثة و تقريبا كتب ارقام عربيتى

المهم وقفت شوية عن الرجوع عشان لو عايز حاجة ييجى

بس هو مجاش فرجعت و دخلت من الشارع اللى قبليه على الشارع الرئيسى

لقيت الظابط طلع من الشاره الجانبى الاولانى و وقفنى و قاللى اركن على جنب

و بيقول للعسكرى كلبش العربية دى و رجع مكانه

و العسكرى ما صدق و جى يكلبش

قلتله اصبر متكلبشهاش و نزلت اكلم الظابط,

.

قلتله خير؟

قاللى رخصك

طلعتهاله و قلتله اتفضل

بيقوللى سير مخالف (على الشارع الجانبى)

قلتله مخالف ازاى؟

قاللى ان الشارع ده اتجاهه عكس منا كنت طالع منه

"المهم ان انا مكملتش فيه 10 متر قبل ما ارجع"

بس هو قال يتوصى بيا و يعمل واجب اضافى... يعنى مش معقول يدفعنى غرامة سير بس

فقعد يلف حوالين العربية و قاللى

عندك ستارة على الزجاج الخلفى

و طلع قدام و قاللى عندك انوار زايدة

"الفوج لايتس"

مع انى مكنتش مشغلها نور عالى

قلتله: انا مكنتش اعرف ان الشارع ده مخالف لأنى اول مرة امشى فيه

و دى حقيقة فعلا.. و مكنش فيه علامة حتى ولا اى حاجة

و قلتله انوار الشبورة دى انا عاملها اضاءة ضعيفة

و يقوللى انت قاصص الجزء الانجليزى اللى فى اللوحات

و قرر يسحب الرخصتين

قلتله: طيب ليه .. متسحب رخصة العربية بس

قاللى لأ هو كدة

و روح خدهم من المرور بكرة

و اخدت الوصل و مشيت
.


اللى يغيظ انا 3/4 عربيات البلد حاطين شماسة على الازاز اللى ورا

و 3/4 العربيات الجديدة بتنزل بأنوار شبورة و ناس كتيرة مركباها لو معندهاش

اللى نفسى اعرفه :هو حلال ينزل فى العربية لكن حرام حد يركبه ؟

و كمان لما هو ممنوع ليه البلد بتسمح بأستيراده و بيعه ؟

و موضوع قطع الجزء الانجليزى

اللوحات طول عمرها بتنزل عربى بس الا من سنتين تلاتة ولا حاجة

بدأوا يعملو فيها انجليزى و حتى شكله متخلف


.
نيجى للأهم
.
لما رحت المرور تانى يوم الرخص مكتش جت

و هو بس قاللى روح بكرة عشان اضرب مشوار ع الفاضى

المهم خليت واحد يسألى اليوم اللى بعديه

قاللى انها جت و ان الظابط كاتب تقرير فى العربية

و طالب مناظرة بينى و بينه قدام وكيل النيابة

و لازم اعمل فحص

المهم رحت تانى يوم عشان اعمل فحص و اثبت

انى شلت الستارة و الانوار و انا اللوحات سليمة

اول حاجة الموظفة قالت اعمل فحص و اثبت انك شلت الانوار

رحت طبعا المنطقة بتاعة الفحص بعيد عن المرور شوية

و كتبلى تمت ازالة الانوار

رجعتلها بالفحص قالتلى لأ دنتا مكتوبلك ستاير و قطع لوحات كمان

ارجع افحص تانى

رجعت لمكان الفحص و المهندس كتبلى تمت ازالة الستارة

و قاللى اللوحات مقصوص منها و تعتبر مزورة !!! يا سلااااااااااااام

قلتله ما هى كدة زيها زى اى لوحات مفيهاش انجليزى

قاللى لأ التانية بتبقى نازلة كدة و لازم تغير بتاعتك من وحدة المرور التابع ليه

حاولت اتفاهم معاه لكن سابنى و مشى و مرضاش يرد تانى

المهم رجعت للموظفة اللى عندها الرخصة و معايا الفحص

و اضطريت استخدم اسلوب الكوسة عشان اخلص من وجع القلب ده

و عرفت اخلص من موضوع مناظرة الظابط و موضوع تغيير اللوحات

قالتلى روح ادفع تامين لوحات 30 جنيه

ده بند للسرقة فى المرور "سرقة مقننة" يعنى لما جبت العربية من 4 شهور دفعتهم

و كان عندى مخالفة من شهر دفعتهم و بيندفعو فى اى دخلة للمرور طبعا بالأضافة للغرامة

بعدين قالتلى روح مبنى بتاع المحكمة سلم الانوار و خللى وكيل النيابة يمضى

رحت هناك سألت قالولى روح لمكتب مش عارف مين عشان تتغرم

رحت و طلع كريم شويتين و كتبلى غرامة 100 جنيه

و قاللى انزل ادفعهم فى الخزنة

نزلت دفعت و بعدين طلعت لمكتب كدة فيه تسليم الانوار قالتلى كمان لازم تسلم الستارة

نزلت تانى جبتها من العربية

و طلعتهالها مع الانوار كتبتلى ورقة و قالتلى روح لوكيل النيابة و قله معايا حرز ! و خليها يمضيلك

طبعا انا مسمعتش كلمة حرز دى الا فى قضايا الممنوعات و السرقة... فجأة الانوار و الستارة بقو حرز

المهم بقى مكتب و كيل النيابة ده حوالين الباب و جو المكتب بتاع 10-15 مخبر كدة

اول ما تقرب بس يهجمو عليك و :اقف هنا داخل فين و عايز ايه؟؟

وكأنى متلغم و داخل اعمل عملية انتحارية و كأنه هو رئيس الجمهورية

المهم اخدت الامضاء و رجعت للأخت اللى سلمتلها "الحرز"

قالتلى روح المبنى اللى فى الوش عند مباحث المرور و خد رقم قضائي

و رحت اخدت الرقم و رجعتلها عاطتنى تأشيره استلام الرخصة من الموظفة الاولى

و رحت اخيرا استلمتهم اخيرا بعد 3 ساعات من اللف و الطلوع و النزول لما خلاص كرهت الدنيا

و فى الاخر عاطيننى الرخص كل واحدة وخدة 5 دبابيس دباسة يعنى 10 خرام لما بقت زى المصفى

و دفعت فى اليوم ده 150 جنيه بالاضافى لفوانيس الشبورة و الستارة اللى اخدوها


.

.
اللى يجن بقى فى البلد دى

ان الحاجات اللى بيخدوها دى بتتوزع على الاصحاب و الحبايب

وتلاقى الظابط او وكيل النيابة او اى حد واصل

ضارب الفاميه الsuper dark black
فى عربيته و عامل اللوحات سوداء فى حجم علبة الكبريت

او ماسح الارقام منها او حاطت سرينة نجدة و دى طبعا "محرمة على الشعب"

بس حلال للباشوات و البهوات

و حاطط جميع الحاجات الممنوعة فى العربية

و يركن فى الممنوع و يمشى مخالف من غير ما يتكلبش ولا يتاخد مخالفة
.

.
طبعا كل ده يدل على العدل و المساواة و يرفع من الروح المعنوية للواحد و يخليه يحب البلد جدا